Nakaisubmitiren ti maika-pito a batch iti ebidensya ti International Criminal Court (ICC) kontra kenni sigud a Presidente Rodrigo Duterte mainaig ti crime against humanity para ti nadara a ‘war on drugs’ idi administrasyon na.
Idi kallabes a Mayo 30 ket insubmitiren ti prosekusyon ti kanayunan a 129 items, malaksid pay dagiti 267 nga ebidensya a naipasa manipud idi nangrugi ti disclosure period idi Abril 30.
Segun kennni ICC Prosecutor Karim Khan a temporario a naka-leave kabayatan a maimimbestigaran ti misconduct case na ket aganay 130K a pakabuklan bilang dagiti dokumento ti relativity database da ti kasapulan a marepaso sakbay a maipubliko.
Intuding met ti prosekusyon ti deadline nga agingga Hulyo 1 para ti panangisubmitir amin nga ebidensya a mausar ti hearing inton Setyembre 23.
Maipalagip a ni FRRD ket naarestar idi Marso 11 babaen ti international warrant para ti crimes against humanity. Segun kadagiti human rights groups, nasurok 30K a tattao iti napapatay idi anti-drug campaign.
Iti agdama ket nakadetene latta ni Duterte iti head quarters ti ICC sadiay The Hague, Netherlands ken idi bulan metlaeng ti Mayo ket imbasura ti ICC ti kiddaw ti kampo na a madiskwalipikar dagiti dua nga ICC judges a mangig-iggem ti kaso.
