LA UNION – Agtultuloy a dukduktalen ti pulisya iti pudno a rangta idiay Ilocos Region dagiti tallo a kameng ti Parojinog Drug Group a natiliw babaen ti checkpoint idiay syudad ti San Fernando, La Union.
Iti ekslusibo a pannakiuman ti Bombo Radyo kenni C/Supt. Rumulo Sapitula, Regional Director ti Police Regional Office-1, base iti istorya dagiti natiliw a miyembro ti drug group ket naggapuda a nagpasyar kadagiti probinysa iti Ilocos.
Iti agdama, nakabalud pay laeng idiay San Fernando City Police dagiti akusado nga agassawa nga isuda Manuelito Francisco, 57, ti maipagarup a maysa kadagiti founder ti drug group ken Ozamiz City Councilor Rizalina Francisco, 54; karaman ti anakda a ni Barangay Chairman June Francisco, 31, ti Barangay San Roque, Ozamiz City.
Sigun kenni C/Supt. Sapitula, tarigagayda met a maammuan no mangbukbukel iti network o contacts iti Amianan a Luzon ti nadakamat a pamilya nga aglemlemeng idiay Manila.
Kabayatanna, nagkedked met a mangted ti pannarita ti akusado iti Bombo Radyo ken kinunada laeng nga ipabus-oyda iti abogado dagiti kaso a sangsanguen dagitoy.
Adda ti warrant of arrest dagiti tallo nga inyatnag ni Ozamis City, Regional Trial Court 1oth Judicial Region Branch 15 Judge Edmundo P. Pintac a napetsaan ti Feb 6, 2018 gapu iti panaglabsing iti Republic Act 9516 ken saan a napalubusa nga agpiyansa dagitoy.
Kabilang din umano ang akusado sa high value target (HVT) drug list na pinaghahanap ng mga otoridad.
Maipalagip nga idi July 30, 2017, napatay ti pulisya idiay mismo balay ti maipagarup a mangidadaulo ti Parojinog Drug Group a ni Ozamiz City Mayor Reynaldo Parojinog karaman iti 14 pay a kakaddua ken kakabagyan daytoy.
Maipagarup a limmaban dagiti Parojinog kadagiti otoridad nga agisirbi ti search warrant.
Karaman ni Mayor Parojinog iti narco-list nga immunan a dinakamat ni Pangulo Rodrigo Duterte iti panagbitlana. (Absalom Flores)
