LA UNION – Napinget ita ti panagensayo ti maysa a cyclist manipud iti probinsia ti La Union para iti umadanin a panaglukat ti Southeast Asian Games (SEA) Games a maangay idiay Malaysia inton bulan ti Agosto.
Iti pannakiuman ken ni Mervin Corpuz a tubo iti Al-alinao, Naguilian, kinunana a daytoy ti kaunaan a gundaway a makipaset daytoy iti SEA Games ken karaman a mangibagi iti Pilipinas kalpasan a nadiskubre idi laeng Pebrero kalpasan ti Le Tour de Filipinas.
Segun kenkuana, 15-anyos pay laeng daytoy idi nangrugi nga agbisikleta ken saanna a ninamnama a mapili nga agbalin a paset ti Philippine Team.
Namnamaenna met nga uray no first timer iti SEA games ket mabaelanna ti makayawid iti medalya para iti Pilipinas.
Ti SEA Games ket maangay idiay Kuala Lumpur inton Agosto 19 agingga 30 ita a tawen.
