BR LA UNION – Siniguro ti Embahada ti Pilipinas idiay Thailand a natalged dagiti atleta a Pilipino a makipaspaset iti 2025 Southeast Asian (SEA) Games.
Daytoy ket laksid ti agtultuloy nga armado a rinnupak iti border ti baetan ti Thailand ken Cambodia.
Segun kenni Philippine Ambassador to Thailand Millicent Cruz-Paredes, nangipakat ti Thai authorities ti security measures tapno masiguro ti kinatalged ti amin a delegasyon iti dakkel nga sports event.
Maibasar iti opisyal, mapas-pasamak ti rinnupak iti innem manipud iti pito a border provinces ti Thailand ken adayu manipud iti kabisera ti Bangkok ken idiay Chon Buri, a pakaisay-sayangkatan ti kaadwan nga ay-ayam iti SEA Games.
Inallokoy ti opisyal ti amin a Pilipino nga agnanaed idiay Thailand a suportaran dagiti atleta a Pilipino.
Ngem nagpalagip kadagiti turista a Pilipino idiay Thailand nga agannad partikular iti panagbiyahe iti border areas nga apektado ti tensiyon.
Inaramid ti embahada ti waragawag kasaruno ti panagatras iti SEA Games dagiti atleta manipud Cambodia gaputi panagdanag da iti security situation sadiay.
