Impaganetget ni Presidente Ferdinand Marcos Jr. nga addaan iti napintas a record ti Pilipinas idiay United Nations laksid kadagiti problema ti korapsyon ken posible nga epekto ti krisis ti langis iti ekonomiya.
Nupay kasta ket saan na met a direkta a sinungbatan nu kasatno a mailungalong ti napintas nga imahe ti pagilian iti sangalubongan a komunidad para kadagiti sumaganad a tawen.
Nu ketdi, imbatad na iti nabayagen nga alyansa ken koordinasyon kadagiti miembro ti United Nations ken imbatad a mano a tawenen a mangipatpatulod ti Pilipinas kadagiti peacekeeping forces kasta met iti panagsungbat kadagiti pagkasapulan ti organisasyon ti sangalubongan a misyon.
Gapo kadagitoy ket agtalek ni Presidente Marcos Junior nga adda iti natibker a pagbasbasaran ti napintas a reputasyon ti pagilian iti uneg ti organisasyon.
Kabayatanna, maysa met nga inlungalong ti gobierno ket ti suporta para iti posible a kandidatura ti Pilipinas kas non-permanent member ti United Nations Security Council.
