LA UNION – Agtultuloy pay iti ar-aramiden nga imbestigasyon ti Municipal Dissater Risk Reduction Management Council maipapan iti pannakatay ti dua nga construction worker a nagaboran ti daga idiay Barangay Urbiztondo, San Juan, La Union.
Iti pannakiuman ti Bombo Radyo kenni MDRRMC head Gino Mabalot, kinuna na a saanda pay a makaipaay ti anyaman nga impormasyon agsipudta saan pay nga nalpas ti imbestigasyon.
Kabayatan na, nabigbig metten dagiti pimmusay a da Vernie Delos Trinos, 25, addaan asawa, residente ti Barangay Cabaroan, iti ili ti Bacnotan ken Juvy Lima, residente ti Barangay Poblacion idiay ili ti San Gabriel.
Immunan a kinuna ni Barangay Urbiztondo Captain Ericson Valdriz nga dead on the spot ti dua a biktima no sadino mismo a doctor ti nangideklara daytoy.
Iti sabali a bangir, saan met a makaipaay ti komentoda dagiti kakadua a construction worker dagiti biktima maipapan ti insidente gaputa maipagarop a saanda nga nakita ti pasamak.
Agtultuloy met nga maag-agasan iti maysa a pribado nga ospital ti nakalasat a construction worker a ni Loreto Baruga, residente ti Barangay Poblacion iti ili a Tagudin, idiay probinsya ti Ilocos Sur.
