Innem a South Korean opposition parties ti nangi-sumite iti gakat idiay parliamento tapno i-impeach ni President Yoon Suk Yeol Yoon, kalpasan iti kellaat a panangideklara na ti martial law idi bigat kalman, Disyembre 4, ngem imbabawi na met laeng kalpasan ti sumagmamano nga oras gaputi timpuar nga standoff ti baetan ti parliamento ken army.
Sumangsango ita ni President Yoon iti nagduduma nga akusasyon seknan iti panangimaton, manipud iti oposisyon a Democratic Party ken iti bukod na a Partido.
Nakatuding a pagbobotosan ti parliamento ti nasao nga impeachment proceedings inton Biyernes wenno Sabado.
Iti maysa nga statement, imbaga ti opposition party a nu saan nga aglosolos iti puwesto ni Yoon, maipursige ti impeachment proceedings maiyannurot iti pagayatan dagiti umili idiay South Korea.
Kinuna met iti maysa a presidential official, a naisingasing iti chief of staff ken senior secretaries ni Yoon nga ag-resign dagitoy.
Pinanggep ni Yoon iti panangi-deklara ti martial law nga ipawil ti anyaman a political activity ken i-censor ti media idiay South Korea, a maibilang nga Asia’s fourth largest economy ken kangrunaan a kaalyado ti Estados Unidos.
Kinuna ni Yoon nga indeklara na ti Martial law tapno depensaan ti pagilian da manipud iti North Korea ken pro-North anti-state forces ken ma-protektaran iti nawaya a constitutional order, ngem nanggubway daytoy ti riribok iti parliament building ken demonstrasyon.
