Sinuspende iti Sangguniang Panlungsod ti implementasyon iti Tricycle Route Plan (TRP) ditoy syudad iti San Fernando, La Union.
Iti naangay a regular session idi kalman nga indauluan ni City Vice Mayor Alfredo Ortega, nangipasa ti Sanggunian ti resolusyon a mangsususpindir iti implementasyon iti TRP ditoy syudad.
Mangnamnama ti Sangguniang Panlungsod iti adu pay a public consultation a maisayangkat iti biyang ti transportation sector ken dagiti commuters.
Sakbay iti daytoy, intantan pay laeng ni San Fernando City Mayor Dong Gualberto ti implementasyon ti TRP ditoy syudad tapno mangisayangkat ti nalawa a consultation kadagiti TODA members, stakeholders ken commuters.
Immunan a kinuna ti alkalde a kalpasan a mangngeganna dagiti isyu ken singasing dagiti TODA members ditoy syudad ket imbilinna ti temporaryo a pannakaitantan ti implementasyon ti TRP ken binilinna dagiti miyembro iti Technical Working Group a mangisayangkat ti pannakabaliw ken pannakaiyurnos iti pagannurutan mainaeg iti implementasyon daytoy.
Nabukel ti TRP babaen ti Department of Interior and Local Government (DILG) kalpasan a naipaulog ti Memorandum Circular No. 2020-036 idi Pebrero 2020 a mangmanmandar kadagiti amin a Local Government Units a mangbukel ti draft ken mangiyemplementar ti Tricycle Route Plan.
