LA UNION – Naisublin iti selda ti La Union Provincial Jail ti balud a naglibas kalpasan a natiliw daytoy dagiti pulis idiay balayda idiay Barangay Bungro, ili ti Luna, La Union.
Naammuan ti Bombo Radyo manipud iti Luna Police Station, nakaawat iti awag ti telepono ti istasyon ti pulisya manipud iti pagbaludan maipapan iti panaglibas ti inmate a ni Renz Morrion Nigos isu a dagusda a nagturong idiay balayna.
Dagus met a natiliw ni Nigos ken naisubli daytoy iti pagbaludan.
Iti palawag ti inmate iti pulisya, maipagarup a naglibas daytoy iti pagbaludan tapno sarungkaran dagiti aginana.
Kabayatanna, sigun met kenni Provincial Jail Warden Rimas Calixto, mangisayangkatda ti imbestigasyon tapno maammuan no kasano a naglibas ti inmate ken duktalenda no sino ti posible nga agsungbat iti insidente.
Ni Nigos ket nakabalud gapu iti sangsanguenna a kaso nga addaan ti pakainaigan iti illegal drugs.
