BR LA UNION – Nagsuwek ken bimtak ti maysa a bassit a medical jet idiay Northeast, Philadephia pasado alas 6:00 p.m. (local time) ti Biyernes, Enero 31, 2025.
Segun iti United States Secretary of Transportation a ni Sean Duffy, innem a tattao ti nakalugan iti nasao a jet, a pakaibilangan ti dua a doktor, dua a piloto, maysa nga ubing a pasyente ken miyembro ti pamilya ti pasyente.
Innem a tattao ti natay a pakaibilangan ti dua a nakalugan iti medical jet ken uppat manipud iti lugar a nakatinnagan daytoy.
Maibasar iti report, napasamak ti insidente 30 a segundo laeng ti napalabas manipud panagtake-off ti Learjet 55 idiay Northeast Philadelphia Airport.
Agturong koma ti nasao a jet idiay Springfield, Missouri.
Iti panagsuwek ti aircraft, nangparnuay daytoy ti explosion ken napuoran ti sumagmamano a babbalay, nakaparada a lugan, ken sumagmamano a business establishment iti ruar ti roosevelt mall.
Agtultuloy iti imbestigasyon dagiti otoridad iti insidente.
Napasamak ti plane crash, dua nga aldaw kalpasan ti fatal collision ti maysa a passenger plane ken military helicopter idiay Washington D.C. a nakatayan ti 67 a tattao, a pasaheros ti dua nga aircraft.
Karaman a natay iti nasao a trahedya ti maysa nga opisyal ti Philippine National Police a ni Police Col. Pergentino Malabed Jr., hepe ti PNP Supply Management Division.
