LA UNION – Imbilin ni C/Supt. Romulo Sapitula, regional director ti Police Regional Office-1 (PRO-1) kadagiti kameng ti La Union Police Provincial Office (LUPPO) a lalo pay a papigsaen ti monitoring ken intelligence gathering kontra kadagiti riding in tandem suspects nga immatake kadagiti naduma-duma a lugar idiay La Union.
Iti pannakiuman ti Bombo Radyo La Union kenni C/Supt. Sapitula, kinunana a naresolba met iti dadduma a kaso ti panangpapatay kadagiti riding in tandem suspects idiay lalawigan gapu ta natukoy metten it suspek ken motibo ti krimen.
Sigun kenni Sapitula, saan nga amin a kaso ti panangpapatay ket adda iti pakainaigan ti iligal a droga, gapu ta dagiti dadduma ket adda iti pakainaigan ti susik iti sanikua wenno personal a gura base ti imbestigasyon a naisayangkat.
Innaklon ti opisyal nga adda ti nagkurangan ti pulisya gapu ta nakalusot dagiti suspek a nangpapatay, ngem impanamnamana a saanda nga agsardeng tapno mapagsungbat dagitoy iti linteg.
Binagaan met ni Sapitula ti LUPPO a saan nga agsardeng ti panangisayangkat iti imbestigasyon tapno magun-od ti hustisya para kadagiti nagbalin a biktima iti pammaltog.
Immapela met ti mangidadaulo iti PRO-1 kadagiti umili a makitinnulong iti pulisya tapno nalaka a maresolba wenno matiliw dagiti riding in tandem suspect.
Kabayatanna, pito iti bilang dagiti nailista a kaso a panangpapatay nga aramid iti riding in tandem suspects idiay probinsya ti La Union manipud iti bulan ti Enero ita a tawen 2018 ken karaman iti nasao a bilang ti napaltugan ket sumagmamano a drug personality.
Iti kauddian nga insidente ti pammapatay ket napasamak idi kalman idiay ili ti Bauang, La Union a nakatayan ti maysa a truck driver. (Absalom Flores)
