BR LA UNION – Inrikep manen ti Iran iti Strait of Hormuz gaputi agtultuloy a “blockade” wenno panang-barikada ti Estados Unidos iti pantalan.
Inawagan ti Iran a “piracy” wenno panagpirata iti kabaybayan ti ar-aramiden ti US.
Maysa nga aldaw laeng kalpasan nga inyanunsyo ti Iran a linuktan dan ti Hormuz Strait kasaruno ti deklarasyon a 10 nga aldaw a ceasefire iti baetan ti Lebanon ken Israel, imbabawi met laeng ti Iranian military.
Inpadamag ti maritime security sources nga adda nangengan a putok ti paltog a mapapati a naggapo iti gunboat ti Iran kontra iti maysa a tanker. Gaputi dayta, adu a barko ti nagsubli gaputi nakaru a tensyon.
Iti Hormuz Strait a dumal-dalan iti aganay 20% a langis iti intero a lubong, isunga nu agrikep daytoy ket mangigubway ti buteng a panagngato manen ti presyo ti langis.
Imbaga ti Iran nga agtalinaed a nairut ti kontrol iti nasao a kabaybayan agingga a saan nga ikkaten ti Amerika ti naval blockade.
