Binabalaw ni Manila Mayor Francisco “Isko Moreno” Domagoso iti Department of Public Works and Highways (DPWH) gapo iti panangipatungpal dagiti infrastructure projects ken flood control iti siyudad nga awanan ti konsultasyon iti lokal a gobierno.
‘Tumigil na po kayo nang pagpapagawa ng hindi kayo nagkokonsulta sa lokal na pamahalaan lalo na sa ilog,’ kenuna ni Isko.
Iti nasao a waragawag ket kalpasan iti naisayangkat a press conference kadua dagiti sumagmamano a Metro Manila mayors ken Korporasyon idiay Pasig City ita nga aldaw ti Biyernes.
Dinakamat met ni Domagoso iti konstruksiyon dagiti sumagmamano a pumping stations, pakairamanan iti Sunog Apog facility idiay Tondo a saan a nagbalin nga epektibo kontra iti layos gapo iti maipagarop a kinakurang ti koordinasyon iti City Hall.
Segun pay iti Mayor, no adda ti umno a koordinasyon ket mabalin a nakissayan iti nagbalin a perdisyon ti layos ken nasakbayan iti panagngato ti kaso ti leptospirosis kadagiti ospital ti siyudad.
Maipalagip nga idi Martes, Agosto 5, kinondena met ni Domagoso iti DPWH gapo iti plano a panangisara ti southbound lane ti Dimasalang Bridge nga awan ti aniaman a pammalubos wenno permit manipud iti gobierno-siyudad. Nangiruar isunan ti cease-and-desist order ken nagpangta a kumpiskaren iti alikamen ti ahensia no maituloy iti proyekto nga awanan ti pammalubos manipud iti Siyudad.###
