LA UNION – Pormalen a naidatagan iti kaso a robbery ti maysa a mannalon a nagtakaw kadagiti piek idiay ili ti Balaoan, La Union.
Immuna iti daytoy, kinemmeg dagiti otoridad ni Jesus Valdez, 26-anyos, residente iti Barangay Butubot Norte kalpasan a nasarakan a nakapupok iti likod ti balayna dagiti 15 a piek a manok.
Maibasar iti insial nga imbestigasyon dagiti otoridad, napaliiw a mismo ti helper ti maysa a farm a nadadael ti ruangan ti pupokan dagiti piek ket dagusna daytoy nga impakaammo iti makinkukua.
Gapu ta atapenda a ni Jesus ti nangala kadagiti manok ket nagturongda iti balay daytoy a nakasarakanda kadagiti mapukpukaw a piek.
Dagusda met nga inyuman kadagiti opisial ti barangay ken pulis ti insidente a nagbanag iti pannakatiliw ni Valdez nga ita ket agtaltalinaed iti pagbaludan.
