BR LA UNION – Umaboten ti 27 a tattao ti natay iti panagduprak ti Super Typhoon Uwan ditoy Pilipinas.
Maibasar iti datos ti National Disaster Risk Reduction and Management Council (NDRRMC) ita nga agsapa ti Miyerkules, Nobiyembre 12, kaadwan kadagiti natay ket gaputi landslide, manipud iti kabantayan a paset idiay Cordillera Administrative Region (CAR).
Tallo ti narekobre a biktima idiay Mountain Province, tallo met idiay Kalinga, uppat idiay Benguet ken 9 idiay Ifugao.
Sumaruno iti Region 2 wenno Cagayan Valley a nakailista ti tallo a natay.
Saggaysa met ti casualty a nailista manipud Region 5,6,7, ken 9.
Kabayatanna, umabot ti 36 nga indibidwal ti nailista a nasugatan bayat a dua a tattao ti agtaltalinaed a mapukpukaw idiay CAR.
Iti pakabuklan, umaboten ti nasurok 3.5 milyon nga indibidwal wenno kaibatugan ti nasurok maysa a milyon a pamilya iti apektado manipud kadagiti nadidigra a rehiyon idiay Bicol Region, Ilocos Region ken Eastern Visayas.
Agtaltalinaed iti evacuation centers iti nasurok pay a 600,000 indibidwal wenno buklen ti 170,000 a pamilya bayat a dagiti dadduma ket napan nagdagus iti dadduma a natalged a lugar.
Nupay addan iti ruar ti Philippine Area of Responsibility (PAR) iti bagyo Uwan sipud pay idi kalman, agtultuloy a mabanbantayan gaputi namnamaen a panagsubli na iti PAR inton malem, Nobyembre 12, sakbay nga ag-landfall idiay southwestern coast ti Taiwan malem wenno rabii.
