LA UNION – Aguray ti House of Representatives kenni Vice President Sara Duterte a dumar-ay iti plenary debates ti OVP budget para iti fiscal year 2025.
Segun kenni Deputy Majority Leader Rep. Jill Bongalon, saan pay a natalantan iti plenaryo ti gakat a budget ti Office of the Vice President, agsipudta napaay ni Vice President Sara Duterte a dumar-ay .
Maipalagip nga inrekomenda ni Minority Leader ken 4Ps Partylist Representative Marcelino Libanan nga itantan da ti deliberasyon agingga Miyerkules, September 25, nga isuti maudi nga aldaw ti plenary budget debates.
Ket nu saan latta nga agparang ti bise president ita nga aldaw ti Miyerkules, iti maudi nga aldaw ti budget deliberations, desisyunanen daytoy ti majority.
Iti committee report ti Appropriations panel, nakissayan iti pondo ti OVP ti aganay P1.3 billion idinto a ti nabati a pondo ket aganay P733 million.
Impaganetget ni Bongalon a nupay adda maipat-patulod nga abogado, ngem saan da met otorisado nga ag-representa iti OVP.
Kinuna ni Bongalon a maip-ipit ita iti sitwasyon ni Lanao del Sur Rep. ZIa Alonto Adiong kas sponsor iti budget ti OVP.
Iti biang ni Deputy Speaker Rep. JayJay Suarez, siniguro na a maipaayan ti dignidad ken respeto iti Office of the Vice President.
