Impannakel ti House of Representatives nga iti sektor ti edukasion iti addaan ti kadakkelan a pondo ti 2026 national budget a nailista iti pakasaritaan ti Pilipinas.
Paset daytoy iti nalawa a reporma tapno masigurado nga iti budget ti pagilian ket maitunos iti prayoridad ken mangipaay ti konkreto a benepisio.
Segun kenni House Appropriations Chairperson Rep. Mikaela Angela Suansing, inkeddeng ti House version a dumanon ti ₱1.28 trillion wenno 4.1% ti Gross Domestic Product (GDP) iti pondo ti sektor.
Limmagpas ti 4% nga international benchmark para iti education spending kalpasan a ninayunan daytoy ti Kamara ti ₱56.6 billion.
Naitukon iti dakkel a paset ti kanayunan a pondo iti Basic Education Facilities Program a dumanon ti ₱63.2 bilyon ken manamnama a makapatakder ken makatarimaan ti nasurok-kumurang 25,200 classrooms.
Pinonduan met ti Kamara iti Universal Access to Quality Tertiary Education (UAQTE) program a mangsungbat iti ₱12.3 billion a panagkurang ti 114 state universities and colleges iti umuna a gundaway sipud idi 2017.
Dumanon ti ₱52.2 billion iti pakabuklan a pondo para iti UAQTE ken dagiti dadduma pay nga scholarship ken training programs a pagnumaran dagiti mapatta-patta a 2.49 million nga agad-adal iti intero a pagilian.#
