Nakasaganan iti House of Representatives para iti panaglukat ti First Regular Session ti 20th Congress ken iti joint session ti Congress para iti maikapat nga State of the Nation Address (SONA) ni Presidente Ferdinand Marcos Jr. inton bigat, Hulyo 28, 2025.
Sinurot ni House Secretary General Reginald Velasco iti panawagan ni Leyte 1st district Representative Ferdinand Martin Romualdez nga ikkaten iti red carpet fanfare ken fashion coverage tapno ipakita iti simpatya kadagiti umili nga apektado ti nalawa a panaglayos ken bagyong Crising, Dante, ken Emong.
Impaganetget ni Speaker Romualdez a saan a maiparbeng a maaddaan ti fashion show idinto ta ado kadagiti umili iti marigrigatan gapo ti epekto ti kalamidad.
Immunan a nagpanawagan ni Romualdez nga aramiden a simple iti panangisayangkat ti SONA.
Impasardeng met ti Presidente iti panangikabil dagiti tarpaulin nga adda pakainaigan na iti SONA agsipudta tarigagay na nga unaen iti pakaseknan ken panangtulong kadagiti umili.
Kabayatanna, mangrugi inton bigat ti oras nga alas-10 iti regular session bayat nga alas-4 ti malem iti SONA ni Presidente Marcos.#
