Pinadas ti kampo ni Alice Guo a lapdan ti panagpresenta ti prosekusion iti uppat a personnel ti Bureau of Internal Revenue (BIR) tapno agtestigo iti pannagdengngeg ti kasona a graft sadiay Valenzuela Regional Trial Court Branch 285.
Dagiti uppat nga BIR personnel nga impresenta ti prosecution ket taga-Bulacan ken Tarlac.
Inkalintegan ti abogado ni Guo a ni Attorney Nicole Jamilla, nga awan ti koneksion ti komprontasion kadagiti kameng ti BIR iti kaso nga graft ti naikkat nga alkalde ken impapilit na a ti pokus ket rumbeng a ti kaso na a graft ken saan a dagiti tax charges.
Impaganetget met ti prosekusion a kayatda nga ipasdek no adda koneksion ni Guo iti Baofu Land Development Inc.
Immunan a naipalgak a ni Guo ti incorporator ti Baofu, a karaman iti POGO Zun Yuan Technology sadiay Bamban, Tarlac a maipagarup a konektado kadagiti illegal nga aktibidad kas iti human trafficking.
Laksid ti addang nga inaramid ti kampo ni Guo, pinalubosan latta ni Judge Orven Kuan Ontalan dagiti kameng ti BIR nga agtestigo.
Rumrumuar pay iti hearing a saan a nakaipila ni Guo iti aniaman a buis sipud idi nag-apply isuna iti Taxpayer Identification Number sadiay Bulacaan agingga a naiyakar idiay Tarlac.
Kabayatanna, agtultuloy ti hearing iti kaso ni Guo inton sumaruno a Martes, Enero 28.
