LA UNION – Naidatagen idiay piskalya ti kaso kontra iti dua a truck driver a nakadungpar iti traysikel a nagbanag ti pannakatay iti dua a sakay daytoy idiay Barangay Pagdalagan Sur, ili ti Bauang, La Union.
Iti pannakiuman ti Bombo Radyo kenni PO3 Roberto Ballesca Jr., imbestigador ti Bauang Police Station, kinunana a kaso a reckless impuredence resulting in homicide and damage to property iti naidatag kontra kada Marlo Acosta ken Armando Junio.
Sigun kenni Ballesca, agparparang iti imbestigasyon nga immuna a nadalapus iti truck a manmanihuen ni Acosta ti sarsarunuen daytoy a traysikel a patpatarayen ni Sonny Orenia.
Maipagarup a nag-overtake iti outer lane ti national highway ni Acosta ken nadungparna ti traysikel a naipullasit pay iti kasungani a linya isu a nadalapus daytoy iti kasinnabat a truck a manmanehuen ni Junio.
Maipagarup a ginandat pay ni Acosta ti naglibas ngem kinamat daytoy iti maysa a motorcycle rider a nakaimatang iti insidente.
Nalukot iti sibubukel a traysikle ken naiselsel pay daytoy iti sirok ti truck a manmanehuen ni Junio.
Agtaltalinaed pay laeng iti kustodiya ti pulisya dagiti respondent drivers kabayatan a maur-uray iti pagbanagan tiu kaso dagitoy.
