LA UNION – Naidatagen idiay prosecutor’s office ti kaso a reckless imprudence resulting to multiple homicide, serious physical injuries and damage to properties kontra iti maysa a driver ti Partas Bus gapu ti napasamak a trahedya iti kawatiwatan ti national highway idiay ili ti Agoo, La Union.
Iti pannakiuman ti Bombo Radyo kenni C/Ins. Roy Villanueva, hepe ti Agoo Police Station, kinunana nga agtaltalinaed iti kwerpo ti pulisya ti respondent driver a ni Rodel Sadac ti Cabugao, Ilocos Sur.
Sigun kenni Villanueva, agingga a saan pay a nairuar iti resolusyon ti piskalya ket agtalinaed pay laeng iti kustodiyada ti nasao a driver.
Immuna iti daytoy, sinuspende ti Land Transportation Franchising and Regulatory Board (LTFRB) ti prangkisa iti pito a units a nakalinya iti naakasidente a bus iti makabulan kalpasan a mapaay ti bus company nga isumite ti kopya ti video ti kidkiddawenda a dashcam, ngem iti video footage ti CCTV camera iti uneg ti lugan ti naited ti nasao nga opisina.
Madama met a maim-imbestigaran ti jeepney a karaman iti nasao nga aksidente a nakatayan iti 20 a nakalugan ditoy idi kaaldawan ti Paskua.
