BR LA UNION – Inlawlawag ti defense lawyer ni sigud a president Rodrigo Duterte a ni Atty. Nicholas Kaufman, a saan a panagpatay ngem ketdi panag-aresto ti kaipapanan ti neutralization iti police operations iti anti-illegal drugs campaign.
Inaramid ni Kaufman iti palawag kas sungbat iti imprisinta nga ebidensiya ti prosekusyon a “PRRD list” a nabirngasan iti media report kas “kill list” a pakairamanan ti sumagmamano a high value targets kabilang da sigud nga Albuera Mayor Rolando Espinosa Sr. ken Raul Yap a nailista kas “neutralized” wenno napatay.
Depensa ni Kaufman, iti neutralization ket maysa a lawful restraint wenno legal a panag-aresto wenno pananglapped iti kriminal ken saan nga awtomatiko a panagpatay.
Ingkalintegan pay ni Kaufman a dagiti natay iti anti-drug operations ket minimal kumpara iti bilang dagiti naaresto ken operasyon nga insayangkat ti state forces.
Sinubliyanan ni Kaufman iti dinakamat a datos ti ICC Prosecution manipud iti Philippine Drug Enforcement Agency (PDEA) nga aganay 5,281 drug personalities iti napatay iti anti-drug operations iti umuna a dua ket kagudwa a tawen a panagtakem ni Duterte.
Impakita pay ni Kaufman ti maysa a chart a mangipakpakita a manipud Hulyo 2016 agingga Pebrero 29, aganay 97% a drug personalities ti naaresto iti anti-drug operations bayat a 3% iti natay.
