BR LA UNION – Suspendido ti klase iti amin a tukad ti pagadalan ken trabaho iti opisina ti gobyerno iti intero a probinsya ti La Union ita nga aldaw ti Martes, Agosto 4, 2026.
Maiyannurot daytoy iti impaulog nga Executive Order No. 41 ti Provincial Government of La Union agsipudta namnamaen ti agtultuloy a pannakapadas ti napigsa a panagtudtudo, a gubwayen ti low pressure area wenno sigud a bagyo Luis ken ti pimmigsa nga habagat wenno southwest monsoon.
Maibasar iti latest weather advisory ti state weather bureau, namnamaen ti agtultuloy a napigsa agingga nakaru a panagtudo ditoy probinsiya ti La Union ita nga aldaw, inton bigat (Aug.5), agingga inton Huwebes (Aug.6).
Gaputi agtultuloy a panagtudo na, nangato ti posibilidad dagiti insidente ti panaglayos ken landslide, nangruna kadagiti nababa a lugar ken landslide prone areas.
Kabayatanna, suspendido met ti face-to-face classes iti amin a tukad idiay Baguio City, Tublay idiay Benguet; Alicia, Benito Soliven, Echague, San Agustin ken Tumauini idiay Isabela; Dupax del Norte ken Santa Fe idiay Nueva Vizcaya; Bataan, Nueva Ecija ken Tarlac; kasta metten idiay Calumpit ken Pulilan sa Bulacan.
Manipud met preschool agingga senior high school ti suspendido idiay Aritao, Nueva Vizcaya ken San Ildefonso, Bulacan.
Segun iti PAGASA, kimmapsoten ti Tropical Depression Luis ken maysa itan a low pressure area (LPA) ken naibabawi metten amin a tropical cyclone wind signals iti Northern Luzon.
Nupay kasta, nabukel ti baro nga LPA idiay West Philippine Sea asideg iti kabaybayan ti Balaoan, La Union gaputi interaksiyon dagiti angin a tugot ti sigud a bagyo.
Mangpatudo pay ti Southwest Monsoon iti Southern Luzon ken lumaod a paset ti Visayas.
