BR LA UNION – Iti naranggas ken nalabes a panangdisiplina kadagiti ubbing ket mabalin a maibilang a ‘child abuse’ nangruna nu pakadadaelan ti dignidad dagitoy.
Daytoy ti nagbalin a desisyon ti Korte Suprema kalpasan a pinasingkedanna iti sentensiya ti maysa nga ama a sumangsango iti tallo a kaso a child abuse gapu iti naranggas ken nalabes a panangdisiplinana kadagiti dua a menor de edad nga annakna.
Iti desisyon ti maikadwa a dibisyon nga insurat ni Associate Justice Jhosep Lopez, tapno maibilang a panangabuso ti disiplina ket masapul nga adda nalawag a panggep a mangdangran wenno mangdadael iti dignidad ti maysa nga ubing.
Nagramot ti kaso idi naireklamo ti maysa nga ama iti panagabuso kadagiti annakna, maysa a balasitang nga agtawen iti 12 ken maysa a lalaki nga agtawen iti 10, manipud 2017 agingga 2018, gaputi panang-kugtar, panang-pungot, ken panang-malo iti kayo nga adda lansa na, ken dadduma pay.
Depensa ti ama a dagiti inar-aramid na ket panang-disiplina laeng kadagiti anak na gaputi saan a nasayaat a kababalin dagitoy, kas iti saan da a pannangan ti pangngaldaw ken pannakaibos ti ur-urnongen da a kuwarta.
Ngem saan a pinaboran ti Regional Trial Court ken Court of Appeals, imbes ket kinedngan da ti ama a guilty iti kaso a panaglabsing iti Republic Act 7610 wenno The Special Protection of Children Against Abuse, Exploitation and Discrimination Act.
Impaganetget ti Supreme Court a nupay dagiti nagannak ket addaan ti karbengan a mang-disiplina kadagiti ubbing, iti wagas ket saan a rumbeng a bayolente, aglap-lapusanan wenno saan a maiparbeng iti naaramid a panagbiddut.
Pinatawan ti Korte iti ama ti dusa a pannakaibalud ti uppat agingga innem a tawen ken mamulta pay ti P45,000 ken kanayunan a kompensasyon nga P80,000 a danyos para kadagiti ubbing.
