BR LA UNION – Tinarget ti sumagmamano a drone attack iti Kuwait International Airport, segun kenni Abdullah Al-Rajhi, tagapagsarita ti Public Authority for Civil Aviation.
Iti interview ti Kuwait News Agency ita nga aldaw, kinuna ni Al-Rajhi nga awan ti naipadamag a natay iti insidente ngem dakkel ti perdisyon a napasamak iti radar system ti airport.
Innayon ni Al-Rajhi, a dagus a nagresponde iti emergency team ken maseknan nga ahensya tapno kitaen iti sitwasyon ken siguradwen iti kinatalged ti operasyon, kasta metten ti panangisubli iti normal nga operasyon iti kabiitan a panawen.
Kabayatanna, nangipeksa ti nakaru a panagdanag dagiti pagilian idiay Gulf region iti posible a panagraut dagiti militia ken proxy armed groups a suportado ti Iran, gapu iti posible a destabilization ken pakarwen da ti mapaspasamak a riribok idiay Middle East.
Iti maymaysa a waragawag ti Qatar, Kuwait, United Arab Emirates, Bahrain, Saudi Arabia, ken Jordan nainget a kondinaren da iti panagraut nga ar-aramiden ti Iran iti bukod da a teritoryo—direkta man wenno babaen kadagiti armado a grupo a sup-suportaran da iti rehiyon.
Iti uneg ti sumagmamano a dekada, maipagarop nga ar-aramaten ti Iran dagiti proxy militia para iti bukod da a foreign ken security policy tapno palawaen ti impluwensya iti rehiyon ken pakapsoten dagiti kalaban da a pagilian.
Kabilang dagiti nasao a proxy militia ket iti Hezbollah idiay Lebanon ken Houthis idiay Yemen, ken dadduma pay nga armado a grupo nga aktibo idiay Iraq ken Syria.
Maipalagip nga idi Biyernes, kinumpirma ti Houthis a nangisayangkat da ti missile strike kontra Israel, kaunaan a gundaway nga inaklon ti nasao a grupo iti direkta a partisipasyon da iti agtultuloy a rinnupak iiay Middle East.
