BR LA UNION – Nangipeksa ti suporta ni La Union Governor Mario Ortega para kenni Bea Millan Windorski a mangibagi ti pagilian iti international competition kalpasan a nangabak ken naitandudo a Miss Universe Philippines 2026 idi rabii ti Sabado, Mayo 2, 2026 idiay Mall of Asia Arena, Pasay City.
Maipalagip nga in-representar ni Windorski ti La Union iti nasao a kompetisyon.
Iti naisayangkat a press conference idi kalman, Mayo 3, 2026, iti Vista la Vita, idiay Brgy. San Vicente, San Fernando City, La Union, kinuna ni Governor Mario Ortega a nangipaay ti dakkel a dayaw para iti probinsiya ti panangabak ni Windorski.
Gaputi dayta, sinigurado ti Gobernador a maipaay ti sibubukel a suporta kenni Windorski nangruna iti panagsagana na iti Miss Universe pageant idiay Puerto Rico inton Nobyembre agdama a tawen.
Manamnama nga itugot ni Windorski iti international stage, iti pintas ti La Union ken intero a pagilian, a pagpasyaran para kadagiti turista.
Innayon pay ni Governor Ortega a nakita na iti kinapudno ni Windorski a nangibagi iti La Union kabayatan ti courtesy visit na ditoy probinsiya, nangruna iti interes na a subliyanan ti pu-on ti pamilyana idiay ili ti San Juan.
Malaksid kenni Windorski, adda met puli na nga Ilocano ni 1969 Miss Universe Gloria Diaz manipud ili nga Aringay.
