LA UNION – Namnamaen a mang-angay iti panagtataripnong ti La Union Police Provincial Office (LUPPO) ken ti dadduma pay a unit ti pulisya tapno trataren ti napasamak a panangatake dagiti riding in tandem suspects kadagiti naduma-duma a lugar idiay La Union.
Iti pannakiuman ti Bombo Radyo kenni C/Ins. Silverio Ordinado, spokesperson ti LUPPO, pagsasaritaanda iti agbalin a sungbat kadagiti napasamak a krimen nga arigna a gungundawayan dagiti suspek ti kangitingitan ti panangipatungpal ti Oplan Tokhang.
Impanamnama met ti LUPPO a saan a maibaw-ing ti imbestigasyon maipapan kadagiti napasamak a pammaltog kadagiti lima a biktima ita laeng a tawen 2018 ken maammuanda met laeng ti pudno a motibo iti tunggal kaso.
Ur-urayenda met iti resulta ti cross matching kadagiti basyo wenno bule ti bala iti paltog a naala manipud kadagiti crime scene tapno maammuan no ania iti pakainaigan dagiti suspek ti tunggal pasamak a pammapatay.
Aminado met ni Ordinado nga iti agdama ket awan pay ti konkreto a konklusyon iti resulta kadagiti maisaysayangkat nga imbestigasyon.
Umap-apela met ti opisyal kadagiti nakaimatan wenno addaan ti ammo maipapan ti pammaltog a saan nga agpaiduyos iti buteng ken maikooperarda iti pulisya tapno matiliw dagiti suspek.
Immuna iti daytoy, dua a lallaki ti pinapatay ti riding in tandem suspects iti nagsina a lugar idiay maikadua a distrito ti La Union idi kalman.
Sipud idi bulan ti Enero 2018 ket umaboten iti lima iti pakabuklan ang bilang ti riding in tandem suspects ti napasamak iti naduma-duma a lugar ditoy probinsya.
