Mangnamnama dagiti nagannak ni Mark Dave Galario Valdez, ti engineering student manipud Pangasinan a nasarakan ti bangkay na a nadundunor ken napuoran iti nasamek a paset ti Bacnotan-Balaoan Provincial Road idiay Barangay Quirino, Bacnotan, La Union idi Hulyo 2, 2024, iti hustisya ti pannakatay ti kakaisuna nga anak da.
Daitoy ket kalpasan nga inarestar dagiti kameng ti Bacnotan Police Station ti maysa nga babai a karaman kadagiti uppat nga akusado ti pammapatay kenni Mark Dave.
Naarestar daitoy kasaruno ti arrest warrant kenkuana iti pagtaenganda, agarop 12:10 iti aldaw idi Biyernes sadiay Barangay Imelda, Naguilian, La Union. Binigbig ni La Union Police Provincial Office director Police Colonel Heryl L. Bruno ti naarestar a 20-anyos a babai ken residente ti nadakamat a lugar.
Kinuna ti Police Director a ti akusado ket addaan iti outstanding warrant of arrest para ti kaso a murder nga intukon ti Regional Trial Court Branch 66 iti Ciudad ti San Fernando, La Union.
Segun iti Bacnotan Police Station, ti naarestar nga indibidwal ket karaman iti brutal a pammapatay kenni Mark Dave Galario Valdez, ken ti tallo pay a kakadwa na ket aktibo a suksukimaten dagiti otoridad.
Inwaragawag ni Police Colonel Bruno a paingeten da pay iti manhunt operation para kadagiti akusado nu kasta ket maikkan ti hustisya iti biktima. Pinadayawan na met dagiti kameng ti operating unit para iti balligi a panagbirok ken panangarestar da ti maysa kadagiti uppat a karaman iti murder case.
