LA UNION – Naminsan manen a nagpalagip La Union Police Provincial Office iti publiko maipapan kadagiti nasken nga aramiden tapno agbalin a natalged ita a Holiday Season.
Iti pannakiuman ti Bombo Radyo kenni S/Sr. Rodelio Samsom, provincial director ti LUPPO, kinunana a masapul a seguraduen dagiti bumalay a natalged manipud kadagiti agtatakaw ti panawan a pagtaengan wenno ipabantay iti kaarruba no agbakasyon dagitoy.
Adda ngamin ti posibilidad a gundawayan dagiti agtatakaw iti rumaut kadagiti babbalay a mapanawan.
Sigun kenni Samson, nasken a seguraduen a nakakondisyon met ti lugan lalo no adu iti biyahe.
Kabayatanna, naimontar metten dagiti pulis kadagiti bus terminals, palengke, simbaan ken kadagiti tourist distinations iti probinsya.
Kinuna ti opisyal, namnamaen nga ita nga aldaw ket dupudop dagiti tattao kadagiti nasao a lugar.
Adda met dagiti naikabil a motorist assistance center kadagiti kangrunaan a kalsada a mabalin a pagturongan dagiti agkasapulan ti tulong.
Iti sabali a bangir, impanamnama ni S/Supt. Samson a natalged iti La Union manipud iti pangta ti terorismo wenno iti New People’s Army isu a nasken nga awan ti pagdanagan iti panagbakasyon. (Absalom Flores)
