LA UNION – Nagpanawagan ti La Union Police Provincial Office (LUPPO) kadagiti barangay officials a makitinnulong kadagiti operatiba iti panangisayangkat ti anti-illegal drugs operation kalpasan nga insubli ni Pangulo Rodrigo Duterte ti pulisya iti war on drugs.
Kinuna ni C/Ins. Silverio Ordinado Jr., spokesperson ti LUPPO, kasapulan iti kooperasyon dagiti opisyal ti barangay iti anti-drug operations kas iti panangiserbi iti search warrant wenno buy bust operation kontra kadagiti drug personalities nga agtultuloy a mangitantandudo iti droga.
Saan koma nga agkedked dagiti barangay officials ang imatangan wenno ag-witness kadagiti operasyon ti pulisya tapno naparpartak iti pannakadalus iti masakupan dagitoy a lugar.
Mainaig iti daytoy, maipagarup nga adda dagiti opisyal iti barangay nga agkedked a makitinnulong kadagiti pulis no adda iti maisaysayangkat nga anti-drug operations iti masakupanda a lugar gapu iti buteng.
Kabayatanna, impanamnama met ti LUPPO a surutenda iti standard operating procedure (SOP) iti panangisayangkat ti war on drugs tapno maprotektaran iti karbengan pantao dagiti matiliw a drug suspects. (Absalom Flores)
