Agtultuloy nga umaw-awat ti tulong dagiti naulila iti napasamak a panagdinnungpar ti bus ken jeep a nakatayan ti 20 a tattao ken nakasugatan ti 9 a sabsabali idiay Agoo, La Union.
Iti nakalap nga impormasyon ti Bombo Radyo La Union, nangted ti P50,0000 financial assistance iti tunggal pimmusay a biktima ken P10,000 financial assistance para met kadagiti nasugatan ti La Union Provincial Governent iti panangiyuna ni Gov. Francisco Emmanuel “Pacoy” R. Ortega III.
Malaksid iti kuarta a naited ket sungbatan met ti gobierno provincial iti amin a magastos iti panagpaagas dagiti dadduma pay a biktima nga agdama nga agpapaagas iti Ilocos Training Regional & Medical Center ditoy syudad ti San Fernando.
Iti agdama, maisagsaganan dagiti naan-anay a dokumento tapno maited ti nasao a tulong kadagiti kakabagyan dagiti biktima.
Immuna ditoy, nangted ti P5,000 burial assistance ti Department of Social Welfare & Development Regional Office iti tunggal pamilya dagiti namatay a biktima.
