LA UNION – Saan a nagustuan ken kwinestiyon ni House Committee on Public Order and Safety Chairperson ken Santa Rosa City Representative Dan Fernandez iti nagbalin nga addang ti lokal a gobyerno idiay Porac, Pampanga kontra iti nadiskubre nga ilegal a POGO hub .
Iti panagdengngeg idiay Kamara ita nga aldaw seknan iti criminal activities dagiti POGO, ginisa ni Fernandez ni Porac Mayor Jaime Capil nu apay nga awan ti inaramid na nga aksyon iti laksid nga ilegal ti Lucky South 99.
Kinuna ni Capil nga Enero pay laeng ita a tawen ket saanen a nangiruar ti permit iti nasao a POGO hub gaputa awanan daytoy ti internet gaming license.
Maipagarop a nagsurat pay iti Lucky South 99 tapno ipaka-ammo dagiti linabsing na, ngem awan ti nagbalin a sungbat ti liderato.
Gaputi dayta, pinalotpot ni Fernandez nu anya iti inaramid ti mayor idinto a rugi pay laeng ti tawen ket awanen iti permit ti POGO ken napalabas pay ti innem a bulan sakbay a naipatungpal ti raid.
Impaganetget ti kongresista, a kas mayor ket impa-rikep na koma ti nasao nga establisimiyento nangruna ket tinagi-awan i POGO iti surat nga impatulod ti opisina ni Capil.
Saanen a nasungbatan daytoy ni Capil isunga imbaga ni Fernandez nga “under oath” dagitoy.
