BR LA UNION – Kinemmeg dagiti tattao ti maysa a lalaki a maipagarop a naaktuan a nagtakaw ti bag ti maysa a market vendor iti uneg ti merkado publiko ditoy siyudad ti San Fernando.
Napasamak ti insidente pasado alas 11:00 ti bigat idi kalman, Disyembre 8, iti spices and food condiments section.
Ti suspek ket agtawen ti 25, construction worker, ken tubo ti Tondo, Manila.
Maibasar iti inisyal nga imbestigasyon ti City of San Fernando Police Station, naimatangan ti kaabay a vendor ti biktima ti maipagarop a panangala ti suspek iti bag, a naglaun ti P36,480 cash, iPhone 15, ken dadduma pay a personal nga alikamen.
Babaen ti tulong ti nasao a vendor ken iti dagus a panagresponde ti sumagmamano a sibilyan, Office of Public Safety (OPS), ken idi agangay dagiti otoridad, ballaygi a natiliw ti suspek.
Dagus a narekobre ti bag nga intaray ti suspek.
Maibasar iti video, nakaraman ti suspek ti pannaka-kabkabil gaputi pungtot ti tattao kenkuana.
Kabayatanna, naipaima ti suspek ken dagiti narekobre nga ebidensiya iti City of San Fernando Police Station para iti umno nga imbestigasyon ken disposisyon.
