LA UNION – Immasideg iti istasyon ti Bombo Radyo ti maysa a 22-anyos a baro tapno agkiddaw iti tulong kalpasan a nakitaray ti 17-anyos a live-in daytoy iti saan pay a nabigbig a ka-textmate-na idiay ili ti Naguilian, La Union.
Iti pannakiuman ti Bombo Radyo kenni Sony Boy Rillera ti Barangay Baraoas Sur ti nasao nga ili, kinunana a namurmurayan laengen daytoy idi tengnga ti rabii idi Enero 9 kalpasan a madlawna nga awanen iti sibayna ti 17-anyos a ka-live-in na a nabigig iti nagan a Lyn-lyn.
Saan metten a nakaturog daytoy ken dagusna a sinapul ti ka-live in gapu iti atapna a simmurot iti ka-textmate-na.
Iti istorya ni Sonny, sakbay a pimmanaw ni Lynlyn ket nabasana pay ti convesation-da iti ka-textmate nga adda iti planoda nga agsarak iti maysa a lugar.
Saan met a kinumprontar ti lalaki ti balasitang kalpasan a mabasana dagiti text messages.
Segun ken ni Sonny, saanda met nga agap-apa ken ni Lynlyn.
Umap-apela met daytoy iti ka-relasyonna nga agawid koman para iti anakda nga agtawen iti maysa.
Kabayatanna, uray ti ina ni Lynlyn a ni Emily Apilado ket agpanpanawagan nga agsubli koman daytoy iti sibay ni Sonny ken iti anakda.
