LA UNION – Naka-confine ita idiay ospital ti maysa a lalaki a maipagarup a binagsol iti kaarrubana idiay Barangay Sta. Rita West, ili ti Aringay, La Union.
Napasamak iti pammagsol itattay alas-12:50 ti parbangon.
Base iti impormasyon a nakalap ti Bombo Radyo manipud idiay Aringay Police Station, maipagarup a kabayatan a magmagna ti 45-anyos a biktima a ni Henry Mamaril ket sinabat isuna ti 42-anyos a suspek a ni Renato Soriano ken nagrikyar dagitoy.
Maipagarup a nagawid ti suspek idiay balayda, ngem idi a nagsubli daytoy ket addaan isuna ti ikot a patadem kasaruno panangbagsolna iti biktima.
Dagus a naiturong idiay ospital ti biktima kalpasan a naglakam daytoy iti sugat ti naduma-duma a paset iti bagina.
Iti agdama, isagsaganan ti puliysa ti kaso kontra iti naglibas a suspek.
