BR LA UNION – Kinumpirma ni County Sheriff Adan Mendoza, a maysan a nalammiis a bangkay idi masarakan da ni Oscar-winning actor Gene Hackman, kadwa na a natay ti pianista nga asawa na a ni Betsy Arakawa, 64-anyos.
Nasarakan dagitoy iti mismo a pagtaengan da idiay Santa Fe City, New Mexico idi malem ti Miyerkoles ken karaman pay a natay ti taraken da nga aso.
Nagnaed ni Hackman idiay Santa Fe, New Mexico, sipud pay idi dekada 1980 ken nagkallaysa da kenni Arakawa, 63, idi 1991.
Segun iti sheriff’s office, saan da nga atapen nga adda napasamak a foul play, ngem saan pay a madetermina ti eksakto a makagapo ti pannakatay dagitoy.
Agtultuloy ti imbestigasyon dagiti otoridad iti nasao nga insidente.
Naam-ammo ti aktor kadagiti nalatak a pelikula, iti telebisyon, teatro ken nangabak ti dua nga Oscars award iti 60-a tawen a showbiz career na.
Sigud a Marine ni Hackman ken simmikat iti raspy a boses na.
Nasurok 80 a pelikula iti inaramid na ken naam-ammo iti kabaelanna a mangted biag kadagiti inakem na a karakter a bida-kontrabida.
Nagretiro iti Hollywood actor manipud iti panag-arte iti maika-70 a tawen na, agsipudta segun kenkuana, kaadwan metten a maidiay-diaya kenkuana a papel ket kas maysan a “lolo”.
Naudi a nabuya isuna idi 2004 iti comedy movie a ”Welcome to Mooseport.”
Naki-kallaysa ni Hackman iti dua a babbai ken naaddaan ti tallo nga annak, isuda:Christopher, Elizabeth Jean, ken Leslie Anne—manipud iti ex-wife na a ni Faye Maltese, a pimmusay idi 2017.
Ni Hackman ket pimmusay iti edad a 95 ken nangibati ti nauneg a legasiya kas maysa a pinaka-respetado nga aktor idiay Hollywood.
