Naballigi iti naisayangkat a Financial Assistance Pay-Out babaen iti pondo ti lokal a gobierno ti Bauang para ti Batch 19 & 20 Burial Assistance para kadagiti 29 a benepisyaryo manipud kadagiti nagduduma a barangay ti nasao nga ili.
Adda iti nasao nga aktibidad da Acting Mayor Tanya Roberta A. De Guzman ken ni Acting Vice Mayor Raymund Ganaden a personal a nakaimatang iti pannakaiwaras ti distribusyon ti financial aid.
Naaramid iti inisyatiba babaen ti panagtitinnulong ti Municipal Social Welfare and Development Office nga idadauloan ni Ms. Arlie R. Alonzo, Local Social Welfare and Development Office, ken dagiti dedikado nga staffs tapno masigurado iti naannayas a panakaiyusuat ti programa.
Iti Burial Assistance Program ket paset iti agtultuloy a social welfare initiatives ti ili a nadisenyo tapno makaipaay ti madagdagos a tulong-pinansyal kadagiti pamilya a napukawan iti ipatpateg ti biag.
Babaen iti panangkissay kadagiti pinansyal a problema iti tiempo ti panagladingit ket mangnamanama iti LGU a mapalag-anan iti rikna ti tunggal miembro ti pamilya a naibati ti pimmusay.
Naipaganetget nga iti Burial Assistance Pay-Out program iti mangimatmat ti panagkumit ti Municipal Government of Bauang, iti sidong ti administrasyon ni Mayor Ma. Clarissa T. Lee, a makaipaay kadagiti serbisyo a mapagnumaran dagiti umili.
