LA UNION – Saanen a kayat ti makibiang pay ni Senate President Francis “Chiz” Escudero iti nagbalin a sinnungbat da Vice President Sara Duterte ken Senadora Risa Hontiveros.
Daytoy ket kalpasan iti nabara a sinnungbat idi kalman da VP Sara ken Sen. Hontiveros bayat ti panang-sukimat iti 2025 proposed national budget ti Office of the Vice President.
Nupay kasta, imbaga ni Escudero nga adda balido a salodsod ni Hontiveros kas paset iti mandato ti Kongreso a sukimaten iti pondo dagiti ahensya ti gobyerno.
Idi masalodsod ni Escudero nu makaapekto iti desisyon ti Senado kas institusyon iti agbalin a pondo ti OVP iti napasamak a sinnungbat da VP sara ken Hontiveros, kinuna na a saan a rumbeng a malaokan ti emosyon.
Kabayayanna, balakad ni Escudero kadagiti mangidadaulo iti opisina ti gobiyerno a maaddaan ti pasensya nu sumungbat kadagiti salodsod dagiti mammanday linteg, agsipudta konektado daytoy iti pagrebbengan ti Kongreso.
Saanen kunana a kasapolan pay a palagipan dagiti ahensya nga agbalin a na-respeto agsipudta adda dagiti chairman ken vice chairman ti komite a mangbayabay kadagiti resource persons ingkaso nga adda ti isyu.
Agtalek ni Escudero iti chairman ti Committee on Finance a ni Senadora Grace Poe a kabaelanna nga imanehar iti naduma-duma nga ahensya ti gobyerno.
Kabayatanna, seknan iti libro a napaulwan ti “isang kabigan” a nagbalin a sentro ti sinnungbat da VP Sara ken Hontiveros a maising-singasing nga ilatangan ti 10 a milyon a piso a pondo, imbaga ni Escudero a pagbobotosan ti mayorya dagiti senador nu ikkaten wenno pagtalinaeden iti budget para iti daytoy.
