BR LA UNION – Nangisayangkat ti sumagmamano a grupo ti ‘lightning rally’ iti batog ti embahada ti pagilian a China idiay siyudad ti Makati ita nga aldaw.
Kas panangipakita daytoy ti nainget a panangkondenar kadagiti agresibo nga aramid ti maysa a ganggannaet a pagilian itay nabiit idiay West Philippine Sea.
Paset ti demonstrasyon iti panang-pisang da ti awit da a karton a bandera ti pagilian a mangipil-pilit a mang-tagikua iti teritoryo a pangbaybay ti Pilipinas.
Impaganetget dagiti grupo a ti insidente ket panaglabsing iti karbengan ti tao ken saa a panang-respeto iti international maritime law.
Gaputi dayta, impanawaganda iti gobyerno ken ti international community a salakniban ken itandudo ti soberanya ken proteksiyon dagiti mangngalap a Pilipino.
Naisayangkat ti demonstrasyon ken protesta kalpasan ti pannakadangran ti sumagmamano a mangngalap idiay Escoda Shoal, West Philippine Sea.
Nadadael ngamin ti sumagmamano a bangka a pagkalap dagiti mangngalap gapu iti timmama a high-pressure water cannon.
Nupay kasta, segun kenni National Maritime Council Spokesperson Retired Vice Admiral Alexander Lopez, narespondian ti Philippine Coast Guard dagiti nasugatan a sibilyan.
