Binabalaw dagiti mamanday linteg idi Lunes ni Bise Presidente Sara Duterte gapu iti dineskribirda a “deafening silence” wenno makatuleng a kinaulimekna mainaig iti agresion ti China kadagiti puersa ken sibilian a Pilipino iti West Philippine Sea.
Segun daitoy kada House Assistant Majority Leaders Paolo Ortega V ti La Union, Zia Alonto Adiong ti Lanao del Sur ken Jil Bongalon ti Ako Bicol party-list kalpasan ti kaudian nga insidente ti maysa nga military aircraft ti China a nangideploy kadagiti flares iti dalan ti maysa a Phiippine Air Force plane nga agpatpatrolia iti rabaw ti Panatag Shoal.
Ti insidente ti nangtignay iti panangkondenar ni Presidente Ferdinand “Bongbong” Marcos, Jr., Armed Forces of the Philippines (AFP) ken Department of Foreign Affairs (DFA).
Iti sabali a bangir, kinuna ni Bongalon a ti hilig ti Bise Presidente nga agsao maipapan iti sovereignty ket kasla abut gapu ta saan met nga agsao maibusor iti agresion dagiti Tsino.
Nangipila ti gobierno ti Pilipinas iti administrasion ni Presidente Benigno Aquino III iti kaso kontra China iti Permanent Court of Arbitration sadiay The Hague idi 2013 gapu iti maulit-ulit nga agresion ti China iti uneg ti Exclusive Economic Zone (EEZ) ti Pilipinas idiay South China Sea kas naited iti sidong ti United Nations Convention on the Law of the Seas a dua a pagilian ti nagpirma iti dayta.
Malaksid iti panang-junking ti nalawa a claims ti China ken panangitandudona iti EEZ ti Pilipinas, inkeddeng pay ti korte ti Hague a ti Panganiban (Mischief) Reef, Ayungin (Second Thomas) Shoal ken Recto (Reed) Bank) ket adda iti uneg ti EEZ ti Pilipinas ken ti Bajo de Masinloc, lokal a pagaammo kas Scarborough shoal, ket gagangay a pagkalap.
Ti West Philippine Sea wenno WPS ti official designation ti gobierno ti Pilipinas kadagiti paset ti South China Sea a karaman iti exclusive economic zone ti pagilian.
Nupay kasta, nagkedked ti Beijing a mangbigbig iti court ruling agingga ita.
