Kinumpirmaran ti National Bureau of Investigation a natiliw dan ti lima nga indibidual a mapapati a nagpartisipar iti hacking incident, partikular iti panaglako iti public data.
Segun iti ahensia, karaman kadagiti natiliw ti dua a foreign nationals.
Nabigbig dagiti mapapati nga agkakasabwat nga isuda Eden Glenn Petilo, Carlo Reyna, John Kenneth Macarampat, Leonel Obina, ken sabali pay nga indibidual a saan pay a nainaganan.
Inlawlawag ti ahensia, in-hack da ti website ti COMELEC kasta met ti website ti maysa pay a cable company.
Maawagan iti grupo kas Blood Security Hackers a maysa a cybercrime group.
Mapapati a tinakawda ti datos dagiti subscribers ken rehistrado a nagan sadanto inlako.
Iti sabali a bangir, impaganetget ni NBI Director Jaime Santiago a daytoy nga addang ket paset laeng ti panangtungpalda iti pammilin ti Presidente Bongbong Marcos a manglapped kadagiti krimen iti online.
