BR LA UNION – Inruaren ti Samahang Basketbol ng Pilipinas (SBP) iti final 12 a Gilas members a makipaset iti FIBA Asia Cup a mangrugi inton Agosto 5 idiay Jeddah, Saudi Arabia.
Idaulwan daytoy da Justin Brownlee, AJ Edu, Kevin Quiambao, Jamie Malonzo, June Mar Fajardo, Scottie Thompson, Dwight Ramos, Japeth Aguilar, Calvin Oftana, Chris Newsome, CJ Perez ken Carl Tamayo.
Dagiti napili ni Gilas coach Tim Cone ket awan nagdumaanna kadagiti players a nakipaset iti Asia Cup Qualifiers final window idi Pebrero.
Inaklon ni Cone nga alanganin koma nga agay-ayam ni Oftana ngem inikkan isuna ti go-signal ti medical team.
Uray ni Fajardo ket agay-ayam iti laksid nga addaan daytoy ti calf injury.
Kabayatanna, saan a karaman iti listaan da RJ Abarrientos, Troy Rosario, Rhez Abando ken Zavier Lucero.
Umuna a makasango ti Gilas iti Chinese Taipei inton Agosto 6, oras ti alas 2 ti malem.
Sumaruno ti Australia inton Agosto 7 ken Iraq inton Agosto 9.
