BR LA UNION – Aminado ni Labor Secretary Bienvenido Laguesma nga awan ti maaramidan iti Department of Labor and Employment iti kanito a maipatungpal iti lockout nu mapukawan ti trabaho ti sumagmamano a mangmangged ti Kawasaki Motor Philippine Corporation (KMPC).
Inlawlawag ni Laguesma nga inaramid ti DOLE ti amin, dimmalan iti National Conciliation and Mediation Board tapno maurnos ti labor dispute iti baetan ti KMPC ken Kawasaki United Labor Union (KULU), ngem laksid ti masurok maysa tawen a mediation meeting, awan ti napasamak nga amicable resolution wenno katulagan ti agsumbangir a benneg.
Maika-90 ita nga aldaw iti isay-sayangkat nga strike dagiti opisyal ti KULU, a nangrugi pay idi Mayo 22, 2025 kalpasan ti economic deadlock iti Collective Bargaining Agreement (CBA).
Segun kenni Atty. John Bonifacio, external counsel ti nasao a kumpanya, aganay 14% ti pakabuklan nga increase a kayat a maipatungpal ti KULU, ngem “financially unsustainable” maibasar iti agdama a sitwasyon ti kumpanya.
Kinuna ti abogado, a nangato unay ti kidkiddawen ti KULU, nasurok doble a nangat-ngato nu ikumpara iti 6% increase nga impaay ti kumpanya itay kallabes para iti Supervisory Union nga addaan ti sabali pay a CBA.
Kidkiddawen ti unyon: iti 10.50% annual salary increase para iti July 1, 2024, 2025, ken 2026; ken kanayunan a P50.00 kada bulan iti basic pay.
Kas panangipakita ti “good faith” ket inaprubaran ti management dagiti demands ti KULU malaksid laeng iti 10.5% salary wage increase agsipudta iti kabaelan laeng ti kumpanya ket agingga 5% ken dadduma pay a kiddaw ti Union.
Kinontra pay ti KMPC iti alegasyon ti KULU nga adda P162-M kada tawen a birok ken P21-M a bank deposits iti kumpanya a pang-sungbat iti demands dagitoy.
Impaganetget ti KMPC, a manipud 2020 agingga 2024 ket aganay P688-M iti lugi da resulta ti pandemic ken naisumite da ti financial statements iti NCMB.
Laksid iti pannakalugi ti kumpanya kadagiti naglabas a tawen, saan a nangipatungpal ti layoff kas konsiderasyon kadagiti empleyado, ngem nangipatungpal ti cost-saving measures iti kumpanya kabilang ti pannakairikep dagiti 14 Kawasaki Service Centers (6 iti Luzon, 8 idiay Visayas-Mindanao) iti tarigagay a makasalimetmet ti kumpanya iti P2.6 Million kada tawen.
Inton Agosto 26 ket maipatungpal ti lockout kadagiti 289 union workers.
Iti Notice of Lockout, impaganetget ti Kawasaki Motors a linbsing dagiti 289 workers iti probisyon a “No Strike/No Lockout” ken binoykot dagiti union workers ti tallo nga opisyal nga aktibidad ti kumpanya idi napan a tawen, kabilang iti anibersaryo idi Hulyo 24, Sportsfest idi Hunyo 15, ken iti mandatory overtime a naiwaragawag idi Abril 30, 2025 tapno magun-od ti kasapolan a produksyon.
Imbaga ni Atty Bonifacio, external counsel ti Kawasaki, iti panaglabsing ti No Strike/No Lockout clause ti CBA ket maibilang nga unfair labor practice, a mabalin nga agserbi a basaran iti lockout.
