LA UNION – Dead on arrival idiay ospital ti maysa a lola kalpasan a madungpar daytoy iti UV express wenno pampasahero a van idiay kawatiwatan iti national highway idiay Barangay Bungol, ili ti Balaoan , La Union itattay alas-7:00 ti bigat.
Nabigbig ti biktima a ni Lolita Nuval, 69, residente ti nasao a lugar.
Naammuan ti Bombo Radyo manipud iti La Union Provincial Mobile Force Company, naiparna nga agpatpatrolya dagitoy iti nasao a lugar idi a napasamak ti aksidente isu a nagtitinnulongda nga iturong idiay ospital ti biktima.
Base iti imbestigasyon ti Balaoan Police Station, maipagarup a bumalballasiw ti biktima iti kalsada iti a nadalapus daytoy ti lugan a manmanehuen ni Lorenzo Manzano ti Barangay Lintic, Banayoyo, Ilocos Sur.
Simmuko met ti driver iti pulisya. (Absalom Flores)
