LA UNION – Isagsaganan ti pulisya iti kaso kontra ti maysa a lolo a natiliw gapu iti panagikotna iti naduma-duma a kuta iti paltog ken bala idiay Barangay Taboc, ili ti San Juan, La Union.
Nabigbig ti 63-anyos a suspek a ni Dionisio Araboy, residente ti nasao a lugar.
Base iti report a nakalap ti Bombo Radyo manipud ti San Juan Police Station, kaddua iti dadduma pay a unit ti pulisya ken gapu iti bileg ti search warrant manipud iti pangukuman, sinukimatda iti balay ti suspek kasaruno iti pannakaduktal iti cal .38 ken cal .22 a paltog, malaksid pay iti bala dagitoy.
Adda itan iti biang ti Criminal Investigation and Detection Group (CIDG) – La Union Provincial Office ti nadakamat a lolo para iti booking process tapno maidatagen ti kaso nga illegal possesion of firearms and ammunitions idiay piskalya. (Absalom Flores)
