LA UNION – Kritikal ita iti kondisyon ti maysa a 62-anyos a nataengan kalpasan a nadayamgus ti kotse iti kawatiwatan ti national highway, sakop ti Barangay Santiago, Bauang, La Union.
Iti biktima a managan Lorenzo Flores, residente ti Barangay Payocpoc Sur ti nasao met laeng nga ili ket agtultuloy a maob-obserbaran iti Intensive Care Unit (ICU) ti Ilocos Training and Regional Medical Center (ITRMC) ditoy syudad ti San Fernando.
Nagsagaba daytoy ti nakaru a pannakadangran kalpasan a madungpar ti kotse, a minaneho ti managan Patrick Hermosa, 25, baro, tubo ti Marikina City.
Naamwan a naka-bisikleta ti biktima ken bumallasiw koma iti bangir a ngalay ti kalsada idi madayamgus ti sumung-sungad a kotse.
Kabayatanna, ni Hermosa ket naggapo iti ili a San Juan ket agawid da koman idiay Marikina idi mapasamak ti aksidente.
Adda itan iti custodiya ti Bauang Police Station iti respondent driver para iti umno a disposisyon.
