LA UNION – Agtaltalinaed pay laeng iti ospital ti maysa a 62-anyos a lolo kalpasan a pang-uren daytoy iti kayo dagiti holdaper idiay Barangay Damortis, ili ti Sto. Tomas, La Union.
Nabigbig ti biktima a ni Rodolfo Orpilla, residente ti nasao a lugar.
Naammuan ti Bombo Radyo kenni S/Ins. Juanito Buaron Jr., hepe ti Sto. Tomas Police Station, kabayatan nga agmanmaneho ti traysikel ni lolo Rodolfo kaddua ti 61-anyos nga asawana a ni lola Ofelia ket dinaanan isuda iti dua a lallaki kasaruno iti panangagaw ti kwarta nga umabot iti P10,000.
Sakbay a naglibas dagiti suspek ket pinang-ur da pay iti kayo ti lolo.
Kalpasan a maala dagiti kwarta ket intarayda pay ti traysikel iti agassawa.
Immarayat met dagiti sumagmamano a residente ken pulis iti lugar tapno itugot iti ospital ken maagasan ti sugat a nilak-am iti bagi ti lolo.
Iti agdama, mangisaysayangkat iti imbestigasyon ti pulisya tapno maammuan iti pakabigbigan dagiti suspek.
