LA UNION – Natay ti maysa a 65-anyos nga Small Town Lottery (STL) collector kalpasan a madungpar daytoy iti UV Express van idiay kawatiwatan ti national highway a sakupen ti Barangay Lingsat, syudad ti San Fernando, La Union pasado alas-9:00 itattay bigat
Nabigbig ti biktima a ni Andres Chan, residente ti Barangay Dalumpinas Este ti nasao a syudad.
Iti pannakiuman ti Bombo Radyo La Union iti driver ti nasao a lugan a ni Jamison Damasco ti Sta. Cruz, Ilocos Sur, kinunana a kabayatan a daldalyasatenna ti kalsada ket maipagarup nga agap-apura a bumalballasiw ti biktima ken binusinaanna pay daytoy tapno mapagtigmaanan.
Gapu ta napartak iti panagpatarayna ket saanna a naliklikan ti lolo a madungpar.
Agtultuloy met iti imbestigasyon ti pulisya tapno maammuan ti sungsungbatan ti nasao a tsuper. (Absalom Flores)
