Impadamag ti Philippine Atmospheric Geophysical and Astronomical Services Administration (PAGASA) a posible a mabukel kas maysa a bagyo iti nasaripatpatan a Low Pressure Area (LPA) iti akin-abagatan a paset ti Mindanao.
Naudi a nakita iti LPA ti kaadayo nga 1,130 km Daya ti Southern Mindanao ken agtaltalinaed iti ruar ti Philippine Area of Responsibility (PAR).
Segun ti PAGASA, manamnama a sumrek ti LPA iti PAR ita nga aldaw ken posible nga agbalin a naan-anay a bagyo iti uneg ti 24 nga oras.
No kaspangarigan sumrek ken agbalin a tropical depression ket mapanaganan daytoy a Bagyong Verbana a posible a mangapektar iti dakkel a paset ti Visayas, Southern Luzon, ken Mindanao.
Kabayatanna, iti extension ti mismo nga LPA ket agdama n a mangap-apektar kadagiti sumagmamano a probinsia kas ti Northern Mindanao, Caraga, Davao Region, Eastern Visayas, ken idiay Bohol.
Manamnama a mangyeg daytoy dagiti nangisit nga ulep ken kellaat a panagtudo.
Agdama metten a mapakpakdaaran dagiti residente kadagiti nadakamat a rehion para iti posibilidad a maaddaan ti layus ken panagreggaay ti daga gapo ti katamtaman agingga napigsa a panagtudo.#
