Nangigubuay ti nalawa a perdisyon ti dimmayeg a magnitude 7.5 a ginggined iti makin-Laud a paset ti pagilian a Japan.
Tallopulo a tattao dagiti nadundunor, nadadael pay dagiti dadduma a kalsada, napukawan ti kuryente dagiti sangkabalayan, ken adda dagiti nailista a babassit a napartuat nga uram.
Simmaruno ti ginggined ket ti tsunami a dimmanon ti 70 a sentimetro ti kangato na isu nga aganay 28K a residente ti kapilitan a nabakwit.
Inapektaran ti ginggined dagiti sumagmamano nga imprastraktura kas ti Shinkansen train services, kasaruno ti pannakapukaw ti suplay ti kuryente kadagiti 2,700 a sangkabalayan.
Kabayatanna, saan met a naapektaran dagiti asideg a nuclear plants ti lugar.
Nagpakdaar ni Japan Prime Minister Sanae Takaichi iti publiko nga agtalinaed nga alerto para ti posibilidad dagiti aftershocks.
Ti pagilian a Japan ket kapada metlaeng ti Pilipinas a masarakan iti “Ring of Fire” a makapadpadas ti tinawen a nasurok-kumurang 1,500 a ginggined. Daitoy ti rason nu apay a maseknan ti agpada a pagilian para kadagiti posible a megaquakes iti masakbayan.
